Il curtîl cuadri

Di spazi funzionâl e opare di bielece

Il curtîl cuadri, intal principi, duncje fin dal Sîscent, al jere un spazi funzionâl aes ativitâts agriculis de famee de Claricini e al dave acet a stalis, scudariis, tiezis, dipuesits e ae torisele di control bande la jentrade dal borc, cemût che al ven documentât intal catastic dal 1757. Chest spazi rurâl al coventave par doprâ cjars, materiâi e imprescj leâts ae gjestion dai possediments agricui de famee a Butinins. Dome intal principi dal Nûfcent il cont Nicolò Claricini Dornpacher (1864-1946) lu à mudât intun zardin formâl elegant, cussì di tornâ a dâi ordin e bielece ae aree, che e je deventade il prin pont par dâi bon acet a cui che al rivave de strade principâl.

Il zardin si disvilupe intune grande jeche cuadrangolâr, dividude in trê sezions simetrichis di stradelis di glerie che si ramifichin de jentrade principâl. Une e mene ae capele di Sante Crôs, intant che chê altre e puarte al curtîl laterâl, sierât di edificis sedi residenziâi che di servizi, tant che la forestarie e lis barcjessis. Lis areis verdis a son insuazadis di arbossits di bos ( Buxus sempervirens), cerpîts in maniere esperte daûr de art topiarie, ven a stâi cuntune tecniche di origjin romane che e permet di dâur formis gjeometrichis ornamentâls a arbui e arbossits. I esemplârs plui piçui a àn formis sferichis, intant che chei plui grancj a cjapin une biele forme coniche staronzade. Il prât, curât cun atenzion meticolose, al è insiorât di vâs barocs elegants di piere artificiâl, cuntun blanc che al salte al voli e in contrast fuart cul vert scûr dal tapêt de jerbe. Tal mieç dal zardin si cjate il poç dal Sîscent, fat su volontât di Francesco de Claricini par sigurâ la provision idriche che e coventave no dome ae vite de famee e dai colons, ma ancje pes ativitâts agriculis e de cjase.

I garofui dal curtîl cuadri

Daspò dai lavôrs di rigjenerazion e ricualificazion dai zardins e dal parc di Vile de Claricini, la testiere di garofui che si grampe ai mûrs dal curtîl cuadri e ufrìs un spetacul straordenari. Viodût il caratar formâl dal zardin, a son stadis selezionadis varietâts che si usin ae mieze ombre, in stât di regalâ floriduris bondantis e continuis, perfetis pal ambient ator.

Svicinantsi, o podìn ricognossi la Clair Matin pal so fueam vert lucit e pes rosis di grandece medie, profumadis in maniere lizere. I siei butui a son di un colôr rose scûr fuart che al sfume in maniere delicade intun rose clâr in plene floridure. Cheste varietât, dal puartament elegant e romantic, e je preseade soredut pe sô capacitât di sflorî in maniere gjenerose, che e sigure plui floriduris vie pe stagjon. E je ancje resistente aes malatiis e al brut timp, e e je caraterizade de capacitât di cressi ae svelte, cuntune fuarce che i permet di cuvierzi grandis superficiis.

Une altre varietât carateristiche e je la Generous Gardener, che si ricognòs cun facilitât pal so profum intens, cun notis di garoful antîc e muscli. Lis sôs rosis, de forme a cope vierte, a son di un delicât colôr di rose che al sfume in maniere progressive par difûr, fin a deventâ cuasi blanc. Chest garoful al ven preseât soredut pe sô afidabilitât e pe gjenerositât des sôs floriduris ripetudis e bondantis dilunc di dute la biele stagjon. La Generous Gardener e cres ae svelte e une vore fisse, in gracie des sôs grandis fueis lusintis e fuartis, di mût di jessi resistente e di adatâsi ben aes cundizions dal zardin.

Par sierâ, si ricognòs la Pierre de Ronsard
un omaç al innomenât poete francês dal XVI secul, cognossût pal so amôr pai garofui. Cheste varietât e je une vore fuarte e resistente aes malatiis, cuntun fueam vert trasparent che al esalte la bielece. Lis rosis, de forme antighe e a pene profumadis, a son caraterizadis di un colôr che al sfume dal blanc e vert te part esterne al rose antîc dentri. La Pierre di Ronsard e je perfete tant che garoful rampighin, in gracie dai siei rams fuarts e ben ramificâts, che i permetin di disvilupâsi in altece cun grande facilitât. No par nuie, intal 2006 la World Federation of Rose Societies le à metude dentri inte preseade “Hall of Fame” dai garofui, ricognossint la sô bielece e cualitâts straordenariis.

Ancje se dopradis tant che rampighinis, chestis varietâts no son plantis rampighinis autentichis: a son cun di fat garofui sarmentôs, che si disvilupin in altece in gracie dai lôr bedecs (rams) luncs e flessibii. Di par se, nissun garoful al è une plante rampighine, stant che no rivin a lâ sù di bessôi, tant che la elare, parcè che no àn discuts adesîfs, vidiçs o gritui par cjapâsi tes superficiis; a àn impen bisugne di une poie par cressi in altece e disvilupâsi cun armonie.