I zardins de Claricini Dornpacher

Un tesaur storic e paisagjistic

Vile de Claricini Dornpacher, cjase di campagne de famee nobile De Claricini Dornpacher, si cjate a Butinins di Muimans, un borgut rurâl dongje di Cividât. Comissionade di Francesco de Claricini e finide intal 1697, la vile e je deventade in curt il simbul de impuartance sociâl e economiche de famee. No je stade dome une residence di campagne, ma ancje il cûr de organizazion agricule e produtive de famee inte zone di Cividât.

L’incjant dai zardins e dal paisaç

Il restaur fat che nol è tant al à marcade la varietât straordenarie dai spazis verts de vile, articolâts in diviersis areis di grant atrat. Il curtîl cuadri e il zardin ae taliane a rapresentin doi esemplis rafinâts di zardin formâl, caraterizâts di un ordin e di une elegance che i dan la volte cun armonie ae spontaneitât dal grant zardin ae inglese, cognossût ancje tant che parc de vile.

Chest parc al va a integrâsi une vore ben cul broili, intune gnove interpretazion de funzion tradizionâl dal broili, midiant di une composizion di pomârs, arbossits antîcs, ulivârs e un prât stabil. Une vore interessant al è ancje il zardin dai sempliçs, o ben l’ort botanic dedicât aes plantis medisinâls e aromatichis.

Al siere chest cuadri il viâl sugjestîf dai ciprès, che al scjavace i vignâi, peant a strent la vile e il paisaç ator. L’insiemi di chescj elements al da vite a un furniment ornamentâl vegjetâl che al è spieli de lungje tradizion venite di modelament dal ambient, une maniere pe nobiltât di esercitâ il propri domini su la campagne, in gracie de art dal vert e de architeture dal paisaç.

Un patrimoni documentât e in evoluzion

Di cuant che a son stâts creâts, i zardins e il parc de vile si son fondûts in maniere armoniose cul paisaç rurâl dulintor. Un catastic dal 1757 al documente l’acès ae vile a Nord, midiant dal curtîl cuadri cun poç centrâl, e a Sud, in gracie dal zardin segret, cuntune stradele di piere che fin al XIX secul e leve indevant intal broili fin al viâl dai ciprès. Chest percors simbolic al meteve insiemi residence e spazis produtîfs, intune armonie perfete tra architeture e paisaç.

Tant che in altris vilis furlanis, no si sa il non dal architet che al à progjetât la residence, cussì come che no si cognossin lis cronologjiis precisis des sôs trasformazions. Lis primis testemoneancis a van indaûr ae seconde metât dal XVII secul, cuant che Giacomo Ermanno Claricini al segne intal so libri contabil (1655-1677) un fit a Butinins, che di chel une part e ven paiade in vin. Chest fat al conferme il rûl centrâl de vile intai grancj possediments de famee a Muimans, Ruvignans e Grupignan.

Tra i membris plui atîfs de famee, Nicolò de Claricini al à spindût cetant timp e risorsis inte sistemazion de vile. Ancje se al viveve a Padue, al è stât daûr dai lavôrs dal 1908 al 1910 sot de vuide dal inzegnîr Ernesto De Paciani. Daspò di une polse vie pe Prime Vuere Mondiâl, i lavôrs a son stâts puartâts indevant vie pai agns ’20 e ’30, cun atenzion particolâr ai zardins, sot de vuide dal cont Nicolò e de fie Giuditta, cognossude tant che Itta.

Il contribût di Giuditta de Claricini

Cuant che al è muart il pari, intal 1946, Giuditta e à ereditade la vile e si è impegnade a fuart par difindi il patrimoni de famee. Intal 1952, e à fat meti dentri il complès di Butinins intal Catalic des Vilis Venitis, in gracie di une schede storiche metude jù di Carlo Someda de Marco, diretôr dal Museu Civic di Udin.

Intal 1961, Giuditta e à otignût il vincul di tutele pe vile e intal 1996, daspò di une lungje bataie, ancje pai zardins, pal parc, pal broili e pes pertinencis. Cheste vitorie culturâl, che in dì di vuê e somee scontade, e je stade il risultât di une lote che Giuditta e à puartât indevant cuintri dai prejudizis dal timp, dimostrant une intraprendence straordenarie.
In gracie dal so impegn, ore presint Vile de Claricini Dornpacher e je un tesaur che al testemonee la armonie tra architeture, paisaç e storie.