Il broili

Inte aree padane dal Venit, un teritori plen di tradizions agriculis e rurâls, il tiermin “brolo” (derivât dal latin tart brogilus) al ven doprât ancjemò in dì di vuê par designâ il broili che si cjate dongje des cjasis. Chest broili, une volte destinât soredut al autoconsum, al veve une funzion fondamentâl inte vite cuotidiane des fameis nobilis e contadinis. Pai Claricini Dornpacher dal ram origjinari cividin, il broili al rapresentave une risorse di impuartance vitâl, no dome pe disponibilitât di pomis frescjis, ma ancje tant che lûc di armonie tra la abitazion e il paisaç ator. Vie pal Votcent e pal Nûfcent, di fat, la ativitât agricule e jere leade a strent ae sussistence familiâr e aes tradizions locâls.

Daspò di une ricualificazion impuartante e atente des areis verdis de vile, la aree in passât destinade a broili e à tornât a cuistâ la sô bielece e funzionalitât, dant di gnûf acet a un broili che al torne a proponi lis varietâts antighis di plantis di pome che a jerin tipichis dal paisaç rurâl venit e furlan. L’intervent, che al veve chê di recuperâ la storicitât di chest spazi, al à viodût la reintroduzion di speciis e di varietâts dal puest, che tantis al jere il pericul che a sparissin par vie de modernizazion e de omogjeneizazion des culturis.

Cjaminant in chest broili metût a gnûf, si pues lâ dentri inte storie e inte nature, cjalant lis varietâts antighis di pomârs, tant che armelinârs, pierçolârs, cjariesârs, marenârs, miluçârs, piruçârs e tantis altris speciis che une volte a insioravin e a caraterizavin il paisaç rurâl venit e furlan. Ognidune di chestis plantis e conte une storie di tradizion agricule, di savês tramandâts e di leam profont cu la tiere.

L’intervent nol à dome chê di restaurâ un aspiet estetic, ma al à une finalitât evidente di conservazion de biodiversitât: preservâ e valorizâ lis varietâts di pomis locâls al significhe, di fat, protezi un patrimoni gjenetic unic che al è ad in plen part de nestre culture agricule. Cun di plui, il broili, in gracie de sô eterogjeneitât e de varietât di plantis coltivadis, al à ancje une funzion ecologjiche impuartante, parcè che al manten l’ecuilibri dal teritori, miorant la cualitât dal teren e dant ricet e ristôr a diviersis speciis di bestiis.

La azion di ricualificazion dal broili, duncje, no recupere dome un aspiet storic e simbolic, ma e cjape sù ancje un impegn pal avignî, cirint di protezi l’ambient e la biodiversitât pes gjenerazions a vignî. Cjaminâ tra i pomârs nol è dome une esperience sensoriâl di bielece naturâl, ma ancje un at di cussience pe tutele di tradizions agriculis che, ancje se menaçadis, a son ancjemò vivis e fondamentâls pal nestri leam cu la tiere.