Il zardin ae inglese

Une spontaneitât ricercjade

Il zardin ae inglese, clamât ancje Parc, al è un dai spazis plui inmagants e sugjestîfs di Vile de Claricini Dornpacher.
Nassût intal Sietcent, il model dal zardin ae inglese al è caraterizât dal ûs dal concet di “pitoresc” che al refude la rigjiditât dai zardins formâi, tant che chei ae taliane e ae francese, par lâ daûr di une vision plui naturâl e informâl.
Al contrari dai zardins gjeometrics, la idee di fonde dal zardin ae inglese e je chê di fâ pensâ a un paisaç che al somei spontani; la disposizion des plantis no ven plui pensade par definî e delimitâ il spazi, ma par creâ une schirie di vogladis e di visions che cui che al cjamine al scuvierç in maniere graduâl, cence mai vê une vision complete di dut.

Il zardin ae inglese de vile di Butinins al è in dut e par dut un spieli des carateristichis di cheste tipologjie di zardin: l’ûs di arbui secolârs, arbossits e plantis autoctonis che a crein un paisaç che, ancje se al da la impression di jessi salvadi, al è simpri curât in maniere precise. Chest zardin nol cîr la simetrie, ma al zuie une vore intal alternâ grandis viodudis e cjantons plui intims, dulà che la nature e somee un paisaç naturâl ma studiât.

Il passaç di un zardin a chel altri

Il passaç dal zardin ae taliane al zardin ae inglese al è segnât di un trat precîs: lis cisis di bos disponudis a semicercli e lis statuis des Cuatri Stagjons. Chest confin simbolic al segne la transizion tra doi monts dal zardin, un formâl e chel altri plui libar e naturâl. La presince di chestis statuis, che a rapresentin lis stagjons, e sugjerìs il cicli de nature, che intal zardin ae inglese si esprim in dute la sô vitalitât e mudament. Passât chest confin, il parc di 17.500 m² si vierç devant dai voi dal visitadôr, a prin trat in maniere spontanie, ma curât intai detais, in contrast net cu la rigjiditât dal zardin ae taliane.

Lis gnovis disfidis

Il zardin ae inglese al è stât un dai spazis plui tocjâts dai mudaments climatics dai ultins agns. Arbui a pedâl alt, tant che pôi, faiârs, cedris e eliçs, che un timp a popolavin il parc, a àn patît pai luncs secs e pai temporâi fuarts tra il 2017 e il 2021, in plui che pe carie dal len che e à ruvinât tancj esemplârs. In gracie di une opare atente di restaur e di ricualificazion, dut câs, il parc al è daûr a tornâ a cjatâ la sô vivarositât.
A son stâts creâts sistemis gnûfs di irigazion e plantâts tancj arbui, stant a chei presints intai documents storics de famee Claricini Dornpacher. Plantis tant che tac dal Gjapon (Cephalotaxus harringtonii), Ciprès gjaponês (Cryptomeria elegans), Cedri de Californie (Calocedrus decurrens), Photinia (Photinia serrulata), Eliç (Quercus ilex) e Pseudotsuga (Pseudotsuga), dutis za documentadis intes compris storichis dal 1910, a son stadis tornadis a plantâ par mantignî intat il caratar dal zardin. Inoltre, sono stati piantati nuovi esemplari, come Albero di tulipano (Liriodendron tulipifera) e Sophora pendula giapponica (Sophora japonica pendula), che sostituiscono alcune piante secolari ormai inadatte alle attuali condizioni climatiche.

Acessibilitât e ortensiis

Achì, il visitadôr al pues amirâ cualchidune des 40 speciis – sù par jù – di ortensiis esistentis. Chestis plantis a rose, cu lis semencis fatis sù ator di une pome, si ricognossin daurman pes lôr rosis che si dan dongje in infloressencis a forme di corimbi o di panole. Tantis rosis a son sterilis, o sei no produsin semencis o pomis; lis rosis plui esternis, in particolâr, al puest dai pics a àn sepai che, deventant plui grancj, a cjapin sù l’aspiet di vêrs e propris pics.

Tra lis varietâts plui interessants presints intal parc a meretin di jessi ricuardadis:

La Ortensie des fueis grandis (Hydrangea macrophylla), origjinarie dal Gjapon e puartade in Europe intal XVII secul. Cheste ortensie si ricognòs pes sôs infloressencis che a van dal blu al blanc, al rose scûr, daûr de composizion de tiere. Il colôr blu si disvilupe in terens acits, dulà che i jonis di alumini a vegnin cjapâts sù cun facilitât des lidrîs, intant che il rose al ven in terens cun plui concentrazion di jonis di calci o di altris elements che i dan cuintri al assorbiment dal alumini.

La Ortensie sierade (Hydrangea serrata), simile ae Ortensie des fueis grandis ma di dimensions plui piçulis, e ven des zonis des monts dal Gjapon e de Coree. Cognossude ancje tant che Ortensie di mont, cheste plante e je preseade pes sôs rosis che a van di rose a blu, daûr dal pH de tiere. Lis sôs fueis ovâls e dintadis i dan un aspiet particolâr, di li che al ven il non “sierade”. Resistente e in stât di adatâsi a diviers climis, cheste ortensie e preferìs la ombre parziâl e un teren ben drenât.

La Ortensie a arbossit (Hydrangea arborescens), la varietât che e à vierte la strade pes ortensiis intai zardins europeans, e je la prime a disflorî tra dutis lis speciis. Lis sôs rosis, di un blanc cjandit o di un rose lizêr, si vierzin a metât Jugn e a mantegnin la lôr bielece fin al principi de stagjon frede.

Il zardin ae inglese de vile di Butinins al è un esempli perfet di cemût che la nature e la art dal zardin a puedin messedâsi par creâ un spazi che al è tal stes timp un ripâr e une forme di espression estetiche.
Tra lis plantis secolârs, i elements architetonics e i intervents resints di ricualificazion, chest zardin al continue a jessi un lûc di bielece e di serenitât, che al met insiemi la tradizion dal passât cu lis dibisugnis dal presint.