Il zardin dai sempliçs

Inte ete di mieç, l’hortus simplicium al rapresentave un ambient fondamentâl pe medisine tradizionâl, un zardin là che si coltivavin plantis dopradis pes lôr proprietâts terapeutichis. Chest spazi nol veve dome une funzion pratiche, ma al jere ancje un centri di cognossince, dulà che la cure dal cuarp e dal spirt si instreçavin cu la nature. Lis plantis che a vignivin coltivadis intal hortus simplicium a jerin clamadis “semplicis”, un tiermin che al marcave chês plantis che, midiant de estrazion direte, a vevin principis curatîfs naturâi. Al contrari, i ‘composits‘ a jerin farmacs rigjavâts misturant diviersis sostancis, creant rimiedis plui complès e dispès plui zovevui.

Lis plantis medisinâls no vignivin dopradis in maniere direte, ma a lavin incuintri a diviers trataments, che a esaltavin lis proprietâts e a permetevin un ûs terapeutic indurant. Tra i metodis plui comuns, la essicazion e la macerazion a jerin doprâts par conservâ lis plantis e preparâlis pal ûs. La oficine, tiermin latin che al designave il laboratori di preparazion dai rimiedis, al deventà il lûc dulà che lis plantis a vignivin trasformadis in estrats, polvars, onzints e tinturis. Di cheste pratiche al è derivât il tiermin “oficinâl”, che ancjemò in dì di vuê si dopre par riferîsi a chês plantis cun proprietâts medisinâls, in stât di jessi trasformadis in preparâts terapeutics zovevui pe salût umane.

In chest contest, il zardin dai “sempliçs” nol jere dome un lûc di culture, ma ancje un laboratori, dulà che il savê botanic, la art de cure e la medisine popolâr si misturavin insiemi par ufrî rimiedis naturâi. Lis plantis medisinâls a vignivin selezionadis pes lôr cualitâts curativis e dispès a jerin acompagnadis di jerbis aromatichis (mindusiis) dopradis par finalitâts alimentârs o par aromatizâ mangjativis e bevandis, ma ancje par sfrancjâsi di cualchi piçule afezion cuotidiane. Basili, osmarin, lavande, tim e salvie, par esempli, a jerin plantis che no dome a insioravin lis cusinis, ma a jerin ancje fondamentâls pal benstâ fisic e mentâl.

Il zardin che ore presint al intint di memoreâ cheste tradizion dai zardins dai sempliçs antîcs nol vûl dome conservâ la memorie storiche di chestis pratichis, ma ancje ripuartâ in vite une varietât di speciis di plantis medisinâls e aromatichis. Chestis plantis a vegnin coltivadis cu la stesse cure e atenzion che i munics e i zardinîrs de Ete di Mieç a dedicavin ai lôr orts, preservant la biodiversitât e mantignint vîfs i metodis naturâi di cure.

In chest zardin moderni, che al va indaûr ae tradizion dal hortus simplicium de Ete di Mieç, la valorizazion des plantis oficinâls e aromatichis e devente une maniere par preservâ il patrimoni botanic e par svicinâ lis gnovis gjenerazions al ûs sostignibil e cussient des risorsis naturâls. Ogni plante, cu lis sôs proprietâts terapeutichis, e je un piçul tesaur che e continue a tramandâ, traviers i secui, la savietât antighe des curis naturâls.