Il viâl dai ciprès

Une jentrade arborade

Il parc al è delimitât di un puarton maestôs di fier batût, decorât cu lis iniziâls “GC” di Guglielmo Claricini e cu la date “1872” che e segne l’an che il cont Claricini al à inviât la riorganizazion des areis verdis e dai spazis de vile. Passât il puarton, si vierç un viâl di ciprès che si slungje par 220 metris tra i vignâi, colegant la residence al paisaç rurâl ator.
L’implant di chescj ciprès al va indaûr al 1937, cemût che al testemonee un ordin di compre conservât in archivi che al regjistre l’acuist di trente esemplârs li dal “Premiato Stabilimento German” di Triest.
La dite e veve diviersis culturis a Redipulie, dongje dal Sacrari che al jere daûr a nassi in onôr dai muarts de Grande Vuere, caraterizât propit di ciprès che si viodin dilunc de scjale monumentâl.

I vignâi ator

Ator dal viâl, si puedin amirâ i vignâi de tignude, coltivâts daûr dai principis de agriculture biologjiche. In plui dai filârs dongje des muris de vile Claricini Dornpacher, la proprietât e cjape dentri ancje un vignâl culinâr a Ruvignans (Cividât), par un totâl di dodis etars. La produzion vinicule e va daûr dal ritmi naturâl des stagjons, cuntun cicli anuâl che al scomence inte Vierte e al viôt il so massim inte vendeme autunâl.
Vie pe Vierte, i pampui de vît a gotin linfe, segnâl dal principi dal cicli vegjetatîf. I butui si vierzin, a nassin lis primis fueis e, pôc dopo, a vegnin fûr i raps. Dilunc dal Istât, i raps a van indevant a madressi, cjapant sù i lôr colôrs definitîfs ae fin de stagjon: indorât pes uis blancjis, ros, blu e viole par chês rossis.
La Sierade, periodi de vendeme, al è un moment delicât, che al domande di cjapâ sù i raps al grât just di maturazion. Daspò de vendeme e de colade des fueis, viers Novembar, si tache a cerpî, une operazion fondamentâl par preparâ lis plantis ae gnove stagjon.
Dilunc dal frêt dal Invier, i lavôrs par cerpî a continuin fin ae fin de stagjon, cuant che i pampui gnûfs a vegnin pleâts cun naturalece e fissâts ai fîi di fier che ju tignaran sù. Cheste tecniche, fie de tradizion, e permet ae vît di cressi in mût ordenât, cui raps al soreli e al aiar.

In ogni stagjon, passant il viâl di ciprès si rive ae seconde fereade, che si vierç su la strade publiche Cividât-Muimans. Il puarton, insuazât di doi pilastris di piere bugnade e di doi mûrs a arc, al zonte un alc di senografic ae fin dal percors di arbui, segnant il confin de proprietât.