Il zardin ae taliane

Il Zardin ae taliane e la tradizion baroche

Intal 1908, Nicolò Claricini Dornpacher al à tornât a dissegnâ il zardin ae taliane che si slargje sul lât a Sud de vile. Biel che la part Nord, cu la sô façade e il curtîl cuadri, e presente un aspiet plui sevêr, la façade Sud e il so zardin a son caraterizâts par elegance e armonie. Chest cjanton vert, sorenomenât “ zardin segret”, al jere risiervât dome al plasê de famee e dai ospits plui intims. Sierât di une balustrade rafinade di piere di Vicence, in stât di marcâ inmò di plui la atmosfere intime, il zardin si presente tant che un piçul ripâr, protet dal mont esterni.
A segnâ i ponts principâi di acès e a bilisiâ il zardin, si drecin cun delicatece vot pilastris decorâts cun motîfs barocs e cun parsore statuis di divinitâts mitologjichis.
Chescj pilastris a son stâts metûts in maniere strategjiche: intor aes fontanis, dongje de sidrere e sul confin che al mene al zardin inglês sul daûr.

Il Gust pal Sietcent di Nicolò Claricini

Cuant che Nicolò al à decidût di tornâ a dissegnâ il zardin, la Europe e jere daûr a vivi il periodi de Belle Epoque, paronât de espression moderniste dal Art Nouveau. Nicolò, dut câs, si sintive plui in sintonie cul “ Sietcentrisim”, un stîl che al ricjapave la tradizion dai zardins de cort di Luîs XIV, il Re Soreli. Il zardin si è ispirât ae decorazion dal parterre de broderie, caraterizât di jechis simetrichis separadis di trois di glerie e di borduris di piere o piçulis cisis. I complicâts ricams vegjetâi creâts cerpint lis cisis a rifletin un gust ornamentâl tipic de epoche.
Nicolò, ancje se fedêl a un gust storicist, nol à trascuradis lis gnovis inovazions tecnologjichis. L’ûs de piere artificiâl, une novitât de epoche, al è stât une sielte impuartante. La sô comparse, leade ae difusion dal ciment Portland intal XIX secul, e à permetût di riprodusi l’aspiet de piere naturâl in maniere plui economiche e indurante. La piere artificiâl e je deventade popolâr, ancje in Friûl, li che a àn contribuît ae sô difusion aziendis dal puest tant che chês di Tonini e Gerolamo D’Aronco – pari dal architet Raimondo.

Il dissen des jechis e la simetrie

Un element di grant incjant intal zardin al è il dissen des dôs jechis zimulis, che al romp cu la rigjiditât dal scheme tradizionâl a ricuadris. La ande des jechis, a curvis e dinamiche, e je insiorade di borduris elegantis di piere artificiâl che a delimitin lis sezions. Tal mieç di ogni compart si cjate une fontane circolâr, bilisiade di cuatri statuis di pups posizionâts daûr dai ponts cardinâi. Il vert che al jemple i spazis cjapâts dentri des borduris di piere al è dât di tapêts di jerbe, cisis di bos cun curvis elegantis e piçui arbui cerpîts a forme di sfere, intun zûc visîf inmagant tra formis orizontâls e verticâls.

Cheste ripartizion gjeometriche dai spazis, tipiche dal zardin ae taliane, e je dade di filârs di arbui, cisis ben curadis e sculturis vegjetâls realizadis cu la art dal cerpî (ars topiaria). Chest stîl al à lidrîs profondis intal Rinassiment, cuant che il zardin al è deventât un lûc no dome par coltivâ, ma ancje pal plasê e pal relax. E jere une evoluzion naturâl dal hortus conclusus medievâl, intal imprin destinât ae culture di pomis, jerbis e plantis medisinâls.

La Lote cuintri de Cydalima perspectalis e il Restaur

Vie pai agns, il zardin al à patît dams par vie de Cydalima perspectalis, un inset invasîf che al à metût in dificoltât lis plantis di bos, menaçant la salût des cisis e des sculturis vegjetâls. Par contrastâ chest probleme, tai lavôrs di ricualificazion e di restaur dal parc si à optât pal rafacon gjaponês Convexa, une plante di cise resistente e simile al bos. La Convexa, in gracie de sô cressite lente e dal so puartament fis, e je stade la sielte ideâl par mantignî la estetiche origjinâl dal zardin.

In gracie di chescj intervents, il zardin al è tornât al so dissen origjinâl, che al jere stât imortalât intes fotografiis di Attilio Brisighelli dal 1923. Chestis imagjins, fatis fâ dal cont Nicolò, a documentavin il splendôr che la vile e veve tornât a cjatâ daspò des dificoltâts frontadis vie pal periodi belic.